Қазақ едім дегенше...

Қазақ едім дегенше...

Қазақ едім дегенше, құсалықпын десеңші,

Тұзағына талайдың тұсалыппын десеңші.

Сәкен, Ілияс, Бейімбет - үш арысты бір түнде,

Арамыздан ап кеткен («Үш әріппін» десеңші.)^{2 р.}

Қазақ едім дегенше, бастық едім десеңші,

Самар асқан составпен астық едім десеңші.

Өзіме өзім, дүние-ай, қас қып едім десеңші,

Қырып салған халқымды (аштық едім десеңші.)^{2 р.}

Қазақ едім дегенше, нар едім ғой десеңші,

Бар дәулетті шашуға бар едім ғой десеңші.

«Кемелденген кездерде» 50 миллион болып,

Құла түзде мыңғырған (мал едім ғой десеңші.)^{2 р.}

Қазақ едім дегенше, дарын едім десеңші,

Әуелетіп «Айдайға» салып едім десеңші.

Бойдан қуат кеткенде ұл-қызыммен қоштасып,

Қарттар үйі алдында (қалып едім десеңші.)^{2 р.}

Қазақ едім дегенше, өлім едім десеңші,

Басындағы әркімнің бөрігі едім десеңші.

Шәкәрімдей шыңырау тектілерді шыңғыртып,

Алпыс жылдай архивке (көміп едім десеңші.)^{2 р.}

Қазақ едім дегенше, бөлтірік ем десеңші,

Шаш-етектен талайға қарыз едім десеңші.

Мың жылда бір туатын Мұқағали секілді,

Алыбымды «абайсыз» (өлтіріп едім десеңші.)^{2 р.}

Қазақ едім дегенше, нағыз едім десеңші,

Шаш-етектен талайға қарыз едім десеңші.

Қолым «қышып» кеткенде ер-азамат үстінен,

Астанаға жазылған (арыз едім десеңші.)^{2 р.}

Қазақ едім дегенше, дінсіз едім десеңші,

Қазақ едім дегенше, құнсыз едім десеңші.

Өзбегіме мал сатып, шашылығын сыраға,

Қосып жеген, дүние-ай, (мұңсыз едім десеңші.)^{2 р.}